Internet asrida ko‘pchilik farzandlarining suratlarini ijtimoiy tarmoqlarga joylashtirib, ular qanchalik yoqimtoy va zukko ekanligini ko‘z-ko‘z qilgisi keladi. Biroq hozirda bolalar uchun eng xavfli insonlar aynan internetga in qurgani haqida kamdan-kam kishi mulohaza yuritadi. AdMe biroz ortiqchadek tuyulsa ham, farzandlaringiz xavf-xatardan yiroq bo‘lishiga imkon beradigan choralar ro‘yxatini tayyorladi.
Suratlarga manzillarni qo‘ymang
Bolangiz ko‘p bo‘ladigan joylar — maktab, sport zali yoki to‘garaklar haqidagi ma’lumotlarni joylamang. Bundan g‘arazli maqsadlari yo‘lida foydalanishlari va ta’qib etishlari mumkin.
Qiziqishini oshkor etuvchi fotolarni joylamang
Uning nimaga qiziqishi haqida bilib, aldash va tuzoqqa tushirish oson bo‘ladi.
Bola haqidagi rasmiy ma’lumotlar bo‘lgan barcha tasvirlarni olib tashlang
Internetda yaqinda olingan viza, pasport yoki boshqa hujjatlar bilan maqtanadigan kishilar bor. To‘liq ismi-sharifi yoki hujjat raqamini bilib, bola qayerda o‘qiyotgani yoki yashayotganini aniqlashdan osoni yo‘q.
Bolalarning mashina yonidagi fotolarini joylashtirmang
Bu eslatma birinchi galda ota-onalar uchun muhim. Jinoyatchilarga tayyor ma’lumot taqdim etishdan tashqari, o‘zingizni ham mushkul vaziyatga solib qo‘yishingiz mumkin. Masalan, ushbu suratdan so‘ng ota-onalar panjara ortiga ravona bo‘ldi.
Yarim-yorti kiyimlardagi suratlarni qo‘ymang
Balki siz va yaqinlaringizga ular qiziq tuyular, lekin ayrim nosog‘lom odamlar ularga boshqacha nazar bilan boqishi mumkin.
Kelajakda farzandingizni xijolat chekishga majbur etadigan fotolar bilan bo‘lishmang
Bolaligimizda internet bo‘lmagan va bunday suratlarni faqat yaqin kishilar ko‘rardi. Hozirda esa farzandlarimiz himoyalanmagan va istalgan rasm kelgusida ularni obro‘sizlantirishi yoki bir umrli isnodga aylanishi mumkin.
Farzandingizning boshqa bolalar bilan birga tushgan suratlarini chop etishdan qoching
Bolangizning do‘stlari yoki sinfdoshlari bilan tushgan suratlarini joylashtirishdan avval ularning ota-onasi bunga qarshilik qilmasligi haqida o‘ylab ko‘ring.
Farzandingiz fotosini ijtimoiy tarmoqqa joylashtirgach (hatto buni faqat do‘stlaringiz bilan baham ko‘rsangiz ham), o‘sha daqiqadan boshlab endi u sizga emas, jamoatchilikka tegishli ekanligi va har qanday kishi istalgan maqsadda foydalanishi mumkinligini yoddan chiqarmang.
Izoh (0)