WBA yo‘nalishining super og‘ir vaznidagi sobiq jahon chempioni Ruslan Chagayev bokschilik faoliyatiga yakun yasadi.
“Ruslan bizga karyerasini yakunlashi haqida ma’lum qildi”, — dedi bokschining menejeri Timur Dugazayev. — “Bunga sabab uning ko‘zlaridagi muammodir. Sog‘liq har doim birinchi o‘rinda bo‘lmog‘i lozim”.
2001-yil Ruslan Chagayev chap ko‘zidagi muammolar sabab operatsiya qilingandi, deb xabar berdi “Sportbox.ru” sayti.
Yaqindagina Butunjahon Boks Federatsiyasi Ruslan Chagayevni chempionlik kamaridan mahrum qilib, bunga sabab sifatida uning amerikalik bokschi Fres Okuyendoga qarshi majburiy jangni paysalga solayotganini ko‘rsatgandi. Bundan tashqari “Oq Tayson” nomi bilan mashhur charm qo‘lqop ustasi WBA reytingidan ham o‘chirilgandi.
2006-yil Chagayev jahonning sobiq chempioni — puertorikalik Jon Ruisni mag‘lub etishga muvaffaq bo‘lgandi. 2007-yilga kelib esa u WBA yo‘nalishi bo‘yicha jahon chempionligini qo‘lga kiritdi. Bu yo‘lda o‘zbekistonlik bokschi rossiyalik Nikolay Valuyevni mag‘lubiyatga uchratgandi.
Izoh (0)