WBA йўналишининг супер оғир вазнидаги собиқ жаҳон чемпиони Руслан Чагаев боксчилик фаолиятига якун ясади.
«Руслан бизга карьерасини якунлаши ҳақида маълум қилди», — деди боксчининг менежери Тимур Дугазаев. — «Бунга сабаб унинг кўзларидаги муаммодир. Соғлиқ ҳар доим биринчи ўринда бўлмоғи лозим».
2001 йил Руслан Чагаев чап кўзидаги муаммолар сабаб операция қилинганди, деб хабар берди «Sportbox.ru» сайти.
Яқиндагина Бутунжаҳон Бокс Федерацияси Руслан Чагаевни чемпионлик камаридан маҳрум қилиб, бунга сабаб сифатида унинг америкалик боксчи Фрес Окуендога қарши мажбурий жангни пайсалга солаётганини кўрсатганди. Бундан ташқари «Оқ Тайсон» номи билан машҳур чарм қўлқоп устаси WBA рейтингидан ҳам ўчирилганди.
2006 йил Чагаев жаҳоннинг собиқ чемпиони — пуэрторикалик Жон Руисни мағлуб этишга муваффақ бўлганди. 2007 йилга келиб эса у WBA йўналиши бўйича жаҳон чемпионлигини қўлга киритди. Бу йўлда ўзбекистонлик боксчи россиялик Николай Валуевни мағлубиятга учратганди.
Изоҳ (0)