Prezident qarori (pdf) bilan “O‘zbekenergo” aksiyadorlik jamiyati tizimida O‘zbekiston Respublikasi Fanlar akademiyasining tugatilayotgan Energetika va avtomatika instituti negizida mas’uliyati cheklangan jamiyat shaklidagi Ilmiy-texnika markazi tashkil etiladi, deb yozadi Norma.
Qaror elektr energetika sohasida ilmiy-texnikaviy rivojlanish darajasini tubdan oshirish va zamonaviy yuqori samarali texnologiyalarni joriy etish, elektr energetika korxonalarini modernizatsiyalash, texnik va texnologik qayta jihozlashning strategik dasturlari amalga oshirilishini ta’minlash, shuningdek, bunga zarur bo‘lgan zamonaviy ilmiy-tadqiqot va laboratoriya bazalarini shakllantirish maqsadida qabul qilindi.
“O‘zbekenergo” AJ Ilmiy-texnika markazi faoliyatining asosiy vazifalari etib quyidagilar belgilandi:
- elektr energetikani rivojlantirishning dolzarb ilmiy-texnologik vazifalarini hal etishga yo‘naltirilgan ishlanmalar va amaliy ilmiy-tadqiqotlarni olib borish;
- elektr energetika sohasida istiqbolli mahalliy ishlanmalarni, shuningdek, ilg‘or xorijiy texnologiyalar va uskunalarni aprobatsiya qilish, sinab ko‘rish va amaliyotga tatbiq etish;
- qayta tiklanadigan energiya manbalaridan foydalanishni jadal kengaytirish hisobiga o‘rta va uzoq muddatli istiqbolga mo‘ljallangan modernizatsiyalash va rivojlantirish dasturlarining loyihalarini tayyorlash va boshqalar.