O‘zbekiston Respublikasi Fanlar akademiyasi Tarix instituti Mirzo Ulug‘bek nomli O‘zbekiston Milliy universiteti huzuridagi Tarix instituti etib qayta tashkil qilinadi, deya xabar bermoqda “Gazeta.uz” Prezident qarori (pdf)ga tayanib.

Qayd etilishicha, ushbu qaror O‘zbekiston tarixi sohasidagi ilmiy tadqiqotlar samaradorligini oshirish, ilmiy-tadqiqot faoliyatining o‘quv jarayoni bilan o‘zaro aloqasini kuchaytirish, o‘zbek xalqi hamda milliy davlatchilik tarixi sohasidagi fundamental va amaliy tadqiqotlarni olib borishga professor-o‘qituvchilarni, katta ilmiy xodim-izlanuvchilar va talabalarni keng jalb qilish maqsadida qabul qilingan.

Milliy universitet huzuridagi Tarix institutining asosiy vazifalari etib quyidagilar belgilandi:

• zamonaviy yondashuvlar, tarixiylik va xolislik tamoyillari asosida mintaqa tarixini, mintaqaning jahon sivilizatsiyasi rivojiga qo‘shgan ko‘p tomonlama hissasini eng qadimgi davrlardan to hozirgi davrgacha chuqur o‘rganish;
• respublikaning butun hududi bo‘ylab etnologik va manbashunoslik tadqiqotlarini tizimli ravishda olib borish;
• o‘zbek xalqi davlatchiligi tarixi bo‘yicha tadqiqotlarni amalga oshirish;
• tarix fanining turli yo‘nalishlari bo‘yicha ilmiy va ilmiy-pedagog kadrlar tayyorlash tizimini takomillashtirish;
• chet ellardagi ilmiy muassasalar bilan hamkorlikni rivojlantirish, ilmiy konferensiya va seminarlar, birgalikdagi tadqiqotlar, loyihalar, xodimlarning malaka oshirishi va o‘qishini tashkil qilish va boshqalar.