Pavel Sheremet o‘ldirilishining asosiy sababi sifatida professional faoliyati ko‘rilayotgani ma’lum qilindi

Jurnalist Pavel Sheremet o‘ldirilishining asosiy sababi sifatida professional faoliyati ko‘rilmoqda. Bu haqda Ukraina bosh prokurori Yuriy Lutsenko ma’lum qildi, deb xabar beradi “Vedomosti”.

“Tergov barcha taxminlarni ko‘rib chiqmoqda, lekin asosiysi — Pavelning professional faoliyati uchun o‘ch olinishi. Mazkur tumanda yashaganlarning ko‘rsatmalarini olyapmiz, guvohlar, shuningdek, Pavelning yaqinlarini so‘roq qilyapmiz”, — deb ta’kidladi Lutsenko.

Prokurorga ko‘ra, 25-iyul, dushanba kuni portlash texnikasi va avtotexnika ekspertizasini o‘tkazishga ekspert sifatida jalb etilgan AQSh FQB xodimlaridan ilk ma’lumotlar olinishi rejalashtirilgan.

Eslatib o‘tamiz, Pavel Sheremet 20-iyul kuni tongda Kiyevda halok bo‘ldi: u ishga ketayotgan mashinada portlovchi qurilma harakatga keldi. Politsiya uning o‘limini qasddan qotillik sifatida baholadi.