GM Uzbekistan o‘z faoliyati haqidagi OAV xabarlarini yana bir bor rad etdi

GM Uzbekistan kompaniyasi bir qator ommaviy axborot vositalari tomonidan O‘zbekiston avtomobilsozlik sanoati atrofidagi vaziyatga bag‘ishlangan chiqishlarga javoban navbatdagi bayonotni tarqatdi. “Gazeta.uz”ning yozishicha, bayonotda “noto‘g‘ri va mutlaqo yolg‘on ma’lumotlar” rad etilgan va “yirik sanoat korxonalaridan birini obro‘sizlantirishga qaratilgan harakatlar” to‘xtatilishiga umid bildirilgan.

“GM Uzbekistan’ning boshqaruvi zamonaviy korporativ uslub va standartlar asosida amalga oshiriladi. ‘O‘zavtosanoat’ aksiyadorlik kompaniyasi rahbariyati kuzatuv kengashidagi ishtiroki orqali General Motors vakillari bilan birgalikda qo‘shma korxonani rivojlantirishning strategik yo‘nalishlarini belgilashda qatnashadi va GM Uzbekistan’ning kundalik operatsion faoliyati bilan shug‘ullanmaydi”, — deyiladi bayonotda.

Bayonotda qayd etilishicha, GM Uzbekistan avtomobil ishlab chiqaruvchi hisoblanadi va “na O‘zbekiston ichida, na undan tashqarida avtomobillarni realizatsiya qilish bilan shug‘ullanadi. Avtomobillar realizatsiyasi vakolatli distribyutorlik tashkilotlari tomonidan amalga oshiriladi”.

“Umum qabul qilingan jahon amaliyotiga ko‘ra, distribyutorlik tashkilotlari turli tijorat banklari va moliya tashkilotlarining kreditlari va qarz mablag‘larini jalb qilish orqali savdoni moliyalashtirish faoliyatini amalga oshiradi. Bundan tashqari, savdoni moliyalashtirish uchun distribyutorlik tashkilotlari faqat qonuniy, umum qabul qilingan mexanizm va vositalardan foydalanadi. Ayni vaqtda, turli maqolalarda O‘zbekiston Milliy banki bunday kelishuvlarning kafili bo‘lgani haqidagi ta’kidlar haqiqatga to‘g‘ri kelmaydi”, — deyiladi kompaniya bayonotida.

“GM Uzbekistan’ning Rossiyadagi amaldagi distribyutorlari — ‘UzDEU Avto Voronej’ va ‘Uzavto Rus’ning ta’sischilari tarkibida biror-bir xususiy shaxs yo‘q. ‘O‘zavtosanoat’ AK, GM Uzbekistan yoki ularga bog‘liq kompaniyalar bir qator ommaviy axborot vositalari tomonidan e’lon qilingan maqolalarda tilga olingan ‘Akademiya UzDEU’ kompaniyasi muassisi hisoblanmaydi, akademiyaning o‘zi esa ‘O‘zavtosanoat’ AK bilan ham, GM Uzbekistan bilan ham hech qanday shartnomviy yoki boshqa munosabatlarga ega emas”, — deyiladi bayonotda.

Bir qator maqolalarda Ravon’ning Rossiyadagi vakolatxonasi marketing departamenti direktori Yelena Kuznetsovaga havola berilgan. Uning so‘zlariga ko‘ra, O‘zbekiston avtosanoati atrofidagi vaziyat borasida u aytgan, deb ko‘rsatilayotgan so‘zlar to‘liq buzib ko‘rsatilgan.

“Jurnalist etikasi yo‘qligidan, aytgan fikrlarim butunlay boshqa yo‘sinda talqin qilingani hamda hayot haqiqatidan mutlaqo uzilgan va, katta ehtimol bilan, vaziyatni beqarorlashtirish uchun o‘ylab topilgan maqsadli maqola ko‘rinishida taqdim etilganidan achchiqlandim”, — dedi Yelena Kuznetsova.

“Avval eksport uchun yuklangan va O‘zbekistonga noqonuniy yo‘llar bilan qaytarib olib kelingan avtomobillarni ichki bozorda sotish “sxemasi” hamda qo‘shni mamlakatlardagi chegaradosh hududlarda bunday maqsadlarda foydalaniladigan “tindirgichlar” borligi haqidagi xabarlarni yana bir bor to‘liq rad etamiz. Bu bilan nafaqat GM Uzbekistan, balki davlat boshqaruvining boshqa organlari ham mutlaqo asossiz ravishda ayblanmoqda”, — deyiladi kompaniya matbuot xizmati bayonotida.

“Eksport-import operatsiyalarini ro‘yxatga olish va hisobini yuritish, shuningdek, bank va bojxona nazorati tizimlari avtomatlashtirilganidan kelib chiqib, eksport uchun deb ko‘rsatilgan avtomobillarni ichki bozorda realizatsiya qilish bo‘yicha xabarlarda tilga olingan soxta sxemalarning na amaliy, na nazariy jihatdan mavjud bo‘lishiga imkon yo‘q”, — deyiladi GM Uzbekistan bayonotida.

• GM Uzbekistan zavodning yopilgani va xodimlar hibsga olingani haqidagi mish-mishlarni rad etdi