Toshkentdagi Turin politexnika universitetiga 2016/17-o‘quv yilida jami 350 nafar talaba bakalavriat bosqichiga o‘qishga qabul qilinishi belgilangan bo‘lib, ulardan 200 nafari “Mashinasozlik texnologiyasi”, 100 nafari “Axborot texnologiyalari va sanoatda avtomatlashtirilgan boshqaruv tizimlari”, “Energetika” va “Sanoat-fuqarolik qurilishi va arxitektura” yo‘nalishlariga esa 25 nafardan talaba qabul qilinishi ko‘zda tutilgan. Bu haqda “O‘zavtosanoat” AK axborot xizmati xabar bermoqda.
Abituriyentlardan hujjatlarni qabul qilish uchun belgilangan vaqt mobaynida 1281 nafar abituriyent onlayn ro‘yxatdan o‘tgan bo‘lib, ulardan 1033 nafari hujjatlarini topshirdi. Universitetga kirish uchun test sinovlari Farg‘ona vodiysidagi abituriyentlar uchun 27-iyunda Andijon viloyatida, boshqa hududlardan hujjat topshirgan abituriyentlar uchun esa 11—12-iyul kunlari Toshkentda bo‘lib o‘tdi.
Andijon shahrida o‘tkazilgan test sinovlarida 48 nafar abituriyent ishtirok etdi. Toshkent shahrida test sinovlari ikki bosqichda o‘tkazildi: test sinovlarining dastlabki kunida 4 guruhdagi abituriyentlar imkoniyatini sinovdan o‘tkazgan bo‘lsa, ikkinchi kuni 5 guruhdagi abituriyentlar o‘z bilimlarini sinab ko‘rdi. Test sinovlari italiyalik mutaxassislar boshchiligida adolat mezonlari asosida yuqori saviyada o‘tkazildi.
Izoh (0)