Asad Putin bilan munosabatlarini “juda ochiq va samimiy” deb ta’rifladi

Suriya prezidenti Bashar Asad Rossiya prezidenti Vladimir Putin bilan doimiy aloqada bo‘lib turadi. Bu haqda Suriya yetakchisi NBC telekompaniyasiga bergan intervyusida ma’lum qildi, deb yozadi “TASS”.

Jurnalistning Putin bilan qanchalik ko‘p suhbatlashgani haqidagi savoliga javoban, Asad ma’lum bir raqamni ayta olmasligini, ammo “ko‘p marta” gaplashganini qayd etdi.

Shu bilan birga, Suriya prezidenti Rossiya yetakchisi bilan munosabatlarini “juda ochiq, samimiy va o‘zaro hurmatga asoslangan” deya ta’rifladi.

Boshlovchi Rossiya yetakchisi Suriyada terrorchilarga qarshi kurashdagi yordami evaziga nimadir so‘ragan-so‘ramaganligi bilan qiziqdi. Bunga javoban Asad: “U hech narsa so‘ragani yo‘q, buning sababi oddiy: uning siyosati qadriyatlarga asoslanadi”, — deya ta’kidladi.