Shu yilning 10-sentabr kuni start oladigan futzal bo‘yicha Jahon Chempionati ishtirokchisi hisoblangan O‘zbekiston terma jamoasi Tojikistonga qarshi o‘rtoqlik o‘yinini 3:3 hisobidagi durang bilan yakunladi.
Toshkentdagi tayyorgarlik rejasiga ko‘ra, O‘zbekiston terma jamoasi uch kun ichida Tojikistonga qarshi uchta o‘yin o‘tkazishi kerak edi. Shularning birinchisida Osiyo vitse-chempioni 27-daqiqadagi gol evaziga mag‘lubiyatdan qutulib qoldi.
Poytaxt Toshkent mezbonlik qilgan 2016-yilgi Osiyo Chempionatida “C” guruhini so‘nggi o‘rinda yakunlagan tojikistonlik futzalchilar O‘zbekistonga qarshi bellashuvda ikki bor hisobda oldinga chiqib olganiga qaramay, yakunda g‘alabani saqlab qola olmadi.
Tojikiston terma jamoasi Osiyo Chempionatida Tailand termasidan 4:5, Vyetnamdan esa 1:8 hisobida yengilgan, faqatgina Xitoy Taypeyi bilan 3:3 hisobidagi durang o‘ynagandi. O‘zbekiston terma jamoasi esa turnir finaliga qadar yetib borgan.
O‘zbekiston Futzal Assotsiatsiyasi xabariga ko‘ra, O‘zbekiston va Tojikiston terma jamoalari o‘rtasidagi ikkinchi bellashuv 13-iyul kuni “O‘zbekiston” sport majmuasida bo‘lib o‘tadi va u 17:00 da start oladi.
Izoh (0)