Ummon poytaxti Masqatdan 150 kilometr masofada joylashgan Vakan qishlog‘ida kuniga uch soat ro‘za tutilishi haqidagi xabarlar rad etildi. Bu haqda, Ummon turizm vazirligi hamda Ummon vaqf va din ishlari vazirligiga asoslanib, Khaleej Times nashri xabar bermoqda.
Ummon turizm vazirligi axborotiga ko‘ra, Vakan qishlog‘ida kuniga uch soat ro‘za tutilishi haqidagi xabarlar haqiqatga mos kelmaydi.
“Buning imkoni yo‘q. Ba’zi tog‘li hududlarda quyoshni ko‘rish qiyin bo‘lsa ham, bu quyosh chiqmadi, degan xulosaga olib kelmaydi”, — dedi Ummon vaqf va din ishlari vazirligi vakili.
Vakan qishlog‘ida istiqomat qiluvchi Salim al-Hadramiyning Gulf News’ga ma’lum qilishicha, uch soatlik ro‘za haqidagi xabarlar asossiz. U va uning qishloqdoshlari Ummonda amalda bo‘lgan rasmiy taqvim asosida, odatdagidek saharlik va iftorlik qiladi.
Bir muddat avval Yaqin Sharqda ommabop hisoblangan Al Arabiya, Huffington Post Arabic, Saudi Daily kabi ommaviy axborot vositalarida Ummonning Vakan qishlog‘ida quyosh 11:00 da chiqib, 14:30 da botishi, shu sababli bu jahondagi eng qisqa vaqt ro‘za tutadigan joy ekani haqida xabarlar tarqatgan edi.
Dengiz sathidan 2 ming metr yuqorida joylashgan Vakan qishlog‘i o‘zining salqin iqlimi bilan tanilgan bo‘lib, u yerga faqat eshaklar va yo‘ltanlamas mashinalarda yetib borish mumkin.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)