Уммон пойтахти Масқатдан 150 километр масофада жойлашган Вакан қишлоғида кунига уч соат рўза тутилиши ҳақидаги хабарлар рад этилди. Бу ҳақда, Уммон туризм вазирлиги ҳамда Уммон вақф ва дин ишлари вазирлигига асосланиб, Khaleej Times нашри хабар бермоқда.
Уммон туризм вазирлиги ахборотига кўра, Вакан қишлоғида кунига уч соат рўза тутилиши ҳақидаги хабарлар ҳақиқатга мос келмайди.
«Бунинг имкони йўқ. Баъзи тоғли ҳудудларда қуёшни кўриш қийин бўлса ҳам, бу қуёш чиқмади, деган хулосага олиб келмайди», — деди Уммон вақф ва дин ишлари вазирлиги вакили.
Вакан қишлоғида истиқомат қилувчи Салим ал-Ҳадрамийнинг Gulf News’га маълум қилишича, уч соатлик рўза ҳақидаги хабарлар асоссиз. У ва унинг қишлоқдошлари Уммонда амалда бўлган расмий тақвим асосида, одатдагидек саҳарлик ва ифторлик қилади.
Бир муддат аввал Яқин Шарқда оммабоп ҳисобланган Al Arabiya, Huffington Post Arabic, Saudi Daily каби оммавий ахборот воситаларида Уммоннинг Вакан қишлоғида қуёш 11:00 да чиқиб, 14:30 да ботиши, шу сабабли бу жаҳондаги энг қисқа вақт рўза тутадиган жой экани ҳақида хабарлар тарқатган эди.
Денгиз сатҳидан 2 минг метр юқорида жойлашган Вакан қишлоғи ўзининг салқин иқлими билан танилган бўлиб, у ерга фақат эшаклар ва йўлтанламас машиналарда етиб бориш мумкин.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)