Angliya futbol terma jamoasi, Yevropa chempionati 1/8 finalida Islandiya futbolchilaridan mag‘lubiyatga uchrasa, ushbu davlat shimolida bepul dam olish imkoniyatini qo‘lga kiritadi. Islandiyaning North Sailing turistik firmasi direktori Gudbyartur Yonsson allaqachon angliyalik futbolchilarning nomiga 23 ta chipta hozirlab qo‘ygan, deb xabar bermoqda “TASS” The Guardian nashriga asoslanib.
“Bizning taklifimiz hurmat va an’anaviy island mehmondo‘stligining namoyishidir, — deb o‘z tashabbusini tushuntirdi turistik soha mutaxassisi. — Bechora o‘yinchilar uchrashuvdan so‘ng darhol Angliyaga qayta olmaydi, negaki 60 million angliyalik ishqiboz bor-yo‘g‘i 300 ming kishilik kichik orol davlati termasidan qabul qilib olingan mag‘lubiyatdan g‘azabda bo‘ladi. Shu bois biz futbolchilar o‘yindan keyingi kunni Shimoliy Islandiyadagi shaharcha atrofida kitlarni tomosha qilib o‘tkazishini istaymiz. Bu ularning mag‘lubiyati uchun ajoyib tovon bo‘ladi”.
Angliya va Islandiya terma jamoalari o‘rtasidagi uchrashuv 28-iyunga o‘tar kechasi, Toshkent vaqti bilan soat 00:00 da boshlanadi. Islandiyaning yangi saylangan prezidenti Gudni Yoxansson uchrashuvni tribunalardan turib tomosha qilishi aytilmoqda.
Izoh (0)