АҚШ мудофаа вазирлиги россиялик ҳамкасблари билан Суриядаги вазият юзасидан шошилинч видеоконференция ўтказди. Бу ҳақда 18 июнь, шанба куни Пентагон матбуот котиби Питер Кук маълум қилди, деб хабар беради «Ведомости».
«Видоконференция 16 июнь куни Россия кучлари томонидан ат-Танфада ИШИДга қарши кураш олиб бораётган Сурия мухолифати кучларига авиазарбалар берилишини муҳокама этиш учун ўтказилди. Мудофаа вазирлиги вакиллари мулоқот чоғида ҳамкасбларига АҚШ тегишли каналлар орқали бу ҳақда огоҳлантирганидан сўнг ҳам Россия мазкур ҳудудни бомбалашни давом эттирганини билдирди», — деб таъкидлади Пентагон вакили.
CNN манбаларига кўра, Россиянинг Су-24 бомбардимончилари Иордания чегарасидан 10 километр узоқда «Янги Сурия армияси» тузилмалари марраларига зарбалар берган. Бунинг оқибатида АҚШ томонидан қўллаб-қувватланадиган мухолифат кучларининг бир неча аъзоси ҳалок бўлган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)