“Roskosmos” kosmonavti Yuriy Malenchenko, NASA va ESA (Yevropa koinot agentligi) astronavtlari Timoti Kopra hamda Timoti Pikdan iborat xalqaro ekipaj bo‘lgan “Soyuz TMA-19M” koinot kemasi 18-iyun, shanba kuni Toshkent vaqti bilan soat 14:15 da Qozog‘istondagi belgilangan manzilga yaqin hududga muvaffaqiyatli qo‘ndi. Bu haqda “Vedomosti” xabar bermoqda.
“Orbitadan tushish va qo‘nish bilan bog‘liq barcha operatsiyalar muvaffaqiyatli o‘tdi. Yerga qaytgan ekipaj a’zolari yaxshi kayfiyatda. Ularning koinotda bo‘lish muddati 186 sutkani tashkil etdi”, — deya ma’lum qilgan Parvozlarni boshqarish markazi vakili.
Shifokorlar tomonidan tekshiruvdan o‘tkazilganidan so‘ng Malenchenko Yulduzli shaharchaga yetkaziladi, Kopra va Pik esa tegishli ravishda AQSh va Yevropaga uchib ketadi. Xalqaro koinot stansiyasiga (XKS) yangi ekipajni eltadigan “Soyuz-MS” turkumidagi koinot kemasining uchirilishi 24-iyundan 7-iyulga ko‘chirildi. “Roskosmos”ga ko‘ra, “parvoz xavfsizligini oshirish” uchun shunday qilingan.
Izoh (0)