Telegram asoschisi Pavel Durov messenjerda shaxsiy ma’lumotlarni ruxsatsiz tarqatish (doksing) va tovlamachilik bilan shug‘ullanuvchi kanallar bloklanishini ma’lum qildi. Bu haqda Tass nashri xabar berdi.
Ma’lum qilinishicha, 20 kun oldin berilgan ogohlantirishidan so‘ng foydalanuvchilardan yuzlab shikoyatlar kelib tushgan.
“20 kun avval joylagan postimdan so‘ng foydalanuvchilar bizga firibgarlik va shantaj haqida yuzlab xabarlar yubordi. Ularga asoslangan holda, shu hafta ko‘plab doksing va tovlamachilik bilan shug‘ullanuvchi kanallarini bloklaymiz. Bizda kanal administratorlari tuhmatli postlarni joylab, keyin pul evaziga ularni o‘chirib tashlagani haqida inkor etib bo‘lmas dalillar bor”, deyiladi Pavel Durov bayonotida.
Uning qo‘shimcha qilishicha, ba’zi kanallar hatto “himoya bloklari” — jabrlanuvchilar nishonga tushmaslik uchun to‘lashi kerak bo‘lgan to‘lovlarni sotish bilan ham qo‘lga tushgan. Durov bunday kanallar klonlarini yaratishning ham foydasi yo‘qligini aytib, ular ham baribir bloklanishini ta’kidlamoqda.
“Telegram doksing yoki tovlamachilik qiladigan joy emas”, degan u.
Izoh (0)