Toshkent viloyatida qurilishi rejalashtirilgan yangi xalqaro aeroport O‘rta Chirchiq tumanida joylashishi mumkin. Bu haqda Toshkent viloyati hokimi Zoyir Mirzayev 11-avgust kuni “Hokimlik soati” yig‘ilishida ma’lum qildi.
Uning so‘zlariga ko‘ra, yangi Toshkent xalqaro aeroporti O‘rta Chirchiq tumanida 1 200 gektar maydonda barpo etiladi. Shuningdek, Bekoboddan Bo‘ka, Piskent va Nurafshon orqali poytaxtga temiryo‘l quriladi.
“Bekobod shahar, Bekobod tuman, Bo‘ka, Piskent, Nurafshon orqali Toshkent shahriga temiryo‘l loyihasi kiritilib, loyihalashtirib, yanagi yil boshla degan topshiriq ketayotgan bo‘lsa, 1 200 gektar aeroport O‘rta Chirchiq tumaniga kelib joylashsa, yana nima qilib berilishi kerak davlat tomonidan, aytinglar-chi?”, degan hokim.
Toshkent viloyatida yangi xalqaro aeroport qurilishi rejalashtirilgani haqida 1-avgust kuni Prezident matbuot xizmati xabar bergandi. Maʼlum qilinishicha, Toshkent shahriga aviayo‘lovchilar oqimi 2030-yilda 15 millionga yetishi kutilmoqda. Lekin bunga hozirgi aeroportning quvvati yetmaydi.
Shahar ichida joylashgani sababli uni kengaytirish imkoni ham yo‘q. Shu bois Toshkent viloyatida yangi xalqaro aeroport qurish rejalashtirilgan. Bugungi kunda xususiy sheriklik bo‘yicha xorijiy kompaniyalar takliflari ko‘rib chiqilmoqda.
Izoh (0)