Markaziy banklar valyuta va foizlar bilan manipulyatsiya qilish hamda erkin fond bozorlariga aralashishni to‘xtatishi lozim. Bu haqda Peterburgdagi xalqaro iqtisodiy forumda ishtirok etgan shveysariyalik taniqli moliyachi va investor Mark Faber ma’lum qildi, deya xabar beradi “RBK”.
Faberga ko‘ra, investorlar hozirgi kunda dunyo besh—o‘n yildan so‘ng qanday ko‘rinishda bo‘lishini tushunmayapti. Shu bois aktivlarni aralash holda — ko‘chmas mulk, aksiyalar, qarz qog‘ozlari va qimmatbaho metallarga teng taqsimlagan ma’qul. Eng ishonchli aktivlar esa oltin, kumush va platinadir.
“Oltin unsiyasi 1999-yili 255 dollarga baholangan bo‘lsa, 2011-yilda 1921 dollargacha ko‘tarildi. Keyinchalik narxlar biroz pasaydi va hozirda unsiyasi 1300 dollar atrofida savdo qilinmoqda. Ba’zan turli valyutalarning qimmatbaho metallarga nisbatan mavqeyi mustahkamlansa-da, uzoq muddatli istiqbolda aynan qimmatbaho metallarga mablag‘ tikish o‘zini oqlaydi”, — deya ta’kidlagan Faber.
Izoh (0)