Dunyoda zo‘ravonlik oqibatidagi yo‘qotishlar birmuncha qisqardi, biroq 2015-yil yakuni bo‘yicha 13,6 trillion dollarni (dunyo yalpi mahsulotining 13,3 foizi) tashkil etib, o‘ta yuqori darajada qolmoqda. Bu haqda Londonda joylashgan Iqtisod va tinchlik instituti tomonidan chop etilgan “Tinchliksevarlik global indeksi”da ma’lum qilingan, deya xabar beradi “TASS”.
Tadqiqotda jahonning 99,7% aholisi istiqomat qiladigan 163 mamlakatidagi vaziyat tahlil etilgan. 120 varaqli hujjatda bildirilishicha, zo‘ravonlik maqsadlariga ishlatilayotgan xarajatlarni sayyoraning barcha fuqarolariga taqsimlab chiqilsa, kuniga 5 dollardan to‘g‘ri keladi.
Zo‘ravonlik tufayli yo‘qotishlarga institut ekspertlari tomonidan mojarolar oqibatidagi (724 milliard dollar), jinoyatlar tufayli (2,5 trillion dollar), ichki xavfsizlik (4,2 trillion dollar) va harbiy xarajatlar (6,2 trillion dollar) kiritilgan.
Dunyoda zo‘ravonlik oqibatidagi iqtisodiy yo‘qotishlar o‘tgan yili 2014-yilga nisbatan 2 foizga yoki 246 milliard dollarga kamaydi. Shu bilan birga, mojarolar sodir bo‘layotgan, murakkab kriminal yoki siyosiy vaziyat hukm surayotgan davlatlarda zo‘ravonlik maqsadlari uchun sarflanayotgan xarajatlar yalpi ichki mahsulotning yarmidan oshig‘ini tashkil etmoqda.
Eng og‘ir vaziyat Suriya va Iroqda kuzatilgan, bu davlatlarda zo‘ravonlik tufayli yo‘qotishlar YaIMning 54 foizini tashkil etgan. Afg‘onistonda bu ko‘rsatkich 45 foizga teng. Venesuela, Janubiy Sudan, Gonduras, Kolumbiya, MAR, KXDR va Lesoto ham mazkur qayg‘uli o‘nlikdan o‘rin olgan.
Izoh (0)