O‘zbekistonlik haydovchilardan biri militsiya mashinasining ruxsat etilganidan katta tezlikda harakatlanayotganini videoga olish uchun soatiga 128 kilometr tezlikda harakatlandi. Haydovchi tomonidan olingan video “Voditeli Tashkenta (Drivers.uz)” guruhida e’lon qilingan.
Videoda video muallifi soatiga 128 kilometr tezlikda harakatlanib, militsiya mashinasiga qariyb yetib olgani va ma’lum muddat militsiya mashinasi bilan bir xil — soatiga 105—115 kilometr tezlikda harakatlangan. Video aholi punktidan tashqaridagi yo‘lda olingan, biroq aynan qayerda olingani ma’lum emas.
Videoxabar ostida fikr bildirgan bir guruh foydalanuvchilar video muallifining qilgan ishini tavakkal qilishga arzimaydigan, noto‘g‘ri harakat deb baholagan, uning o‘zini Yo‘l harakati qoidalarini buzishda ayblagan. Foydalanuvchilardan biri video muallifiga videoregistrator o‘rnatib olishni tavsiya qilgan.
“Bu yerda har kim har qanday fikrni aytishi mumkin, men xafa bo‘lmayman. Qonun posbonlari qonunni buzayotganini ko‘rsatgim keldi, xolos”, — deya tanqidchilarga javob berdi video muallifi. Ba’zi foydalanuvchilarning qayd etishicha, militsiya mashinasi xizmat yuzasidan tezlikni oshirgan bo‘lsa, miltillovchi ko‘k-qizil chiroqlarini yoqib olishi kerak edi.
Ma’lumot uchun, O‘zbekistonda amalda bo‘lgan Yo‘l harakati qoidalari 79-bandiga muvofiq, aholi punktlaridan tashqarida yengil avtomobillarga tezlikni soatiga 100 kilometrdan oshirmasdan harakatlanishga ruxsat etiladi.
Ma’muriy javobgarlik to‘g‘risidagi kodeksning 128-3-moddasi 1-qismiga ko‘ra, haydovchi tomonidan belgilangan harakat tezligini soatiga 20 kilometrdan ko‘p bo‘lmagan kattalikda oshirib yuborish eng kam ish haqi (EKIH)ning bir baravari (30-may holatiga ko‘ra — 130 240 so‘m) miqdorida, 20 kilometrdan ortiq, lekin 40 kilometrdan ko‘p bo‘lmagan kattalikda oshirib yuborishi EKIHning besh baravari (651 200 so‘m) miqdorida jarima solinishiga sabab bo‘ladi.
Izoh (0)