Toshkentdagi Abdulla Qodiriy ko‘chasining Oloy bozori yaqinidan o‘tgan qismida yo‘l qatlamining yuqori qismi ta’mirlash maqsadida olib tashlangani, ayni vaqtda, ta’mirlash ishlari haqida hech qanday ogohlantiruvchi belgilari o‘rnatilmagani oqibatida, bir qator haydovchilar moddiy zarar ko‘rdi, yo‘l-transport hodisalar yuz berdi. Bu haqda Facebook’dagi “Voditeli Tashkenta” guruhida fotoxabar qoldirilgan.
“Ehtiyot bo‘linglar, Central kafesi yaqinidagi ko‘prik ostiga tushayotganda tezlikni pasaytiringlar. Asfaltni “shilib olishibdi”, ko‘rmay qoldim, balonim yorilib ketdi”, — deb yozadi jabrlanuvchilardan biri.
Muhokamaga qo‘shilgan foydalanuvchilar orasida aynan shu yo‘lda avtomobili g‘ildiragi sinib, endi ustaxonada o‘tirgan haydovchilar ham topilgan. Boshqa bir foydalanuvchi ham shinasi yirtilib ketganini qo‘shimcha qilgan.
Guruh foydalanuvchilarining qo‘shimcha qilishicha, Abdulla Qodiriy ko‘chasining asfalti ko‘chirib olingan qismida “Jiguli” va Lacetti avtomobillari ishtirokida avariya ham yuz bergan.
“Tunneldan chiqib kelayotgan “Jiguli” yo‘lning bu ahvolda ekanini kutmagan shekilli, birdan tormozni bosdi, ortidan esa yetarlicha katta tezlikda kelayotgan Lacetti yetib oldi. Yaxshigina to‘qnashuv bo‘ldi”, — deb yozadi foydalanuvchilar.
“Voditeli Tashkenta” guruhi a’zolari ta’mirlash ishlari olib borilayotgan yo‘llarga tegishli ogohlantiruvchi belgilar, peshlavhalar o‘rnatilishi zarurligi, zarurat tug‘ilsa, yo‘llarning bunday qismlarida yo‘l nazoratchilari navbatchilik qilishi kerakligini yozgan.
Izoh (0)