Toshkentdagi Driver’s Village avtosalonida 27-may, juma kuni yangi Chevrolet Nexia avtomobilining taqdimoti bo‘lib o‘tdi.
Taqdimot marosimida yangi Chevrolet Nexia nafaqat O‘zbekiston va MDH mamlakatlarida, balki Yaqin Sharq va Afrika avtobozorlarida ham sotilishi ma’lum qilindi. GM Uzbekistan Operations vakilining ta’kidlashicha, “yangi Nexia xaridorlar ishonchini to‘la oqlay oladi”.
Eski N150 modelidan farqli ravishda, yangi Nexia’da ABS va haydovchi xavfsizlik yostig‘i bor. Mashina, shuningdek, immobilayzer, kunduzgi old chiroqlar (DRL) hamda Isofix bolalar o‘rindiqlari uchun mustahkamlagichlar bilan ta’minlangan.
Model GM Powertrain-Uzbekistan tomonidan ishlab chiqarilgan sig‘imi 1,5 litrga teng, 16 klapanli 109 ot kuchiga ega benzinli S-TEC III dvigateli va besh bosqichli mexanik yoki olti bosqichli avtomat tezlik uzatmalar qutisi yordamida harakatga keladi.
Uchinchi LTZ pozitsiyada avtomat (tiptronik funksiyali) tezlik uzatmalar qutisi mavjud bo‘lib, mazkur pozitsiyada mexanik tezlik uzatmalar qutili mashinalar ham taqdim etiladi.
Mashina 11 rangda taqdim etiladi (shulardan 4 tasi — yangi ranglar). To‘rt kegayli rul chambaragi Lacetti’niki bilan bir xil. Uchinchi pozitsiyada rul chambaragida audiotizimni boshqarish moduli mavjud.
Audiotizimda Bluetooth, AUX, handsfree bor. USB porti to‘xtash tormoz dastasi yonida qulay qilib joylashtirilgan. Hajmi 400 litr bo‘lgan yukxona kalit va haydovchi eshigidagi tugma orqali ochiladi.
Izoh (0)