Ўзбекистонлик ҳайдовчилардан бири милиция машинасининг рухсат этилганидан катта тезликда ҳаракатланаётганини видеога олиш учун соатига 128 километр тезликда ҳаракатланди. Ҳайдовчи томонидан олинган видео «Водители Ташкента (Drivers.uz)» гуруҳида эълон қилинган.
Видеода видео муаллифи соатига 128 километр тезликда ҳаракатланиб, милиция машинасига қарийб етиб олгани ва маълум муддат милиция машинаси билан бир хил — соатига 105—115 километр тезликда ҳаракатланган. Видео аҳоли пунктидан ташқаридаги йўлда олинган, бироқ айнан қаерда олингани маълум эмас.
Видеохабар остида фикр билдирган бир гуруҳ фойдаланувчилар видео муаллифининг қилган ишини таваккал қилишга арзимайдиган, нотўғри ҳаракат деб баҳолаган, унинг ўзини Йўл ҳаракати қоидаларини бузишда айблаган. Фойдаланувчилардан бири видео муаллифига видеорегистратор ўрнатиб олишни тавсия қилган.
«Бу ерда ҳар ким ҳар қандай фикрни айтиши мумкин, мен хафа бўлмайман. Қонун посбонлари қонунни бузаётганини кўрсатгим келди, холос», — дея танқидчиларга жавоб берди видео муаллифи. Баъзи фойдаланувчиларнинг қайд этишича, милиция машинаси хизмат юзасидан тезликни оширган бўлса, милтилловчи кўк-қизил чироқларини ёқиб олиши керак эди.
Маълумот учун, Ўзбекистонда амалда бўлган Йўл ҳаракати қоидалари 79-бандига мувофиқ, аҳоли пунктларидан ташқарида енгил автомобилларга тезликни соатига 100 километрдан оширмасдан ҳаракатланишга рухсат этилади.
Маъмурий жавобгарлик тўғрисидаги кодекснинг 128-3-моддаси 1-қисмига кўра, ҳайдовчи томонидан белгиланган ҳаракат тезлигини соатига 20 километрдан кўп бўлмаган катталикда ошириб юбориш энг кам иш ҳақи (ЭКИҲ)нинг бир баравари (30 май ҳолатига кўра — 130 240 сўм) миқдорида, 20 километрдан ортиқ, лекин 40 километрдан кўп бўлмаган катталикда ошириб юбориши ЭКИҲнинг беш баравари (651 200 сўм) миқдорида жарима солинишига сабаб бўлади.
Изоҳ (0)