Ekvatorial Gvineya termasi O‘zbekistonga qarshi o‘rtoqlik o‘yiniga 20 nafar futbolchi bilan Toshkentga tashrif buyuradi

Ekvatorial Gvineya terma jamoasi bosh murabbiyi Esteban Bekker 2-iyun kuni Toshkentda O‘zbekiston termasiga qarshi bo‘lib o‘tadigan o‘rtoqlik uchrashuvi uchun 20 nafar futbolchini tarkibga jalb etdi, deb xabar bermoqda O‘zbekiston futbol federatsiyasi matbuot xizmati.

• O‘zbekiston termasi 2-iyun kuni Toshkentda Ekvatorial Gvineya bilan o‘rtoqlik o‘yinida maydonga tushadi

Esteban Bekker bosh murabbiyligidagi terma jamoa 3-iyun kuni qit’a saralashi doirasida Benin terma jamoasiga qarshi maydonga tushishi kerak edi. Ammo, FIFA kongressida Benin terma jamoasiga qarshi sanksiya qo‘llangani va mazkur terma jamoa FIFA tasarrufidan chiqarilgani bois, o‘yin bekor qilindi.

Ekvatorial Gvineya terma jamoasi so‘nggi rasmiy uchrashuvini shu yilning mart oyida, o‘z maydonida Mali terma jamoasiga qarshi o‘tkazgan hamda 0:1 hisobida mag‘lub bo‘lgandi.

• Odil Ahmedov, Vitaliy Denisov va Sardor Rashidov O‘zbekiston milliy terma jamoasiga chaqirilmadi

Ayni damda FIFA reytingida 83-o‘rinda borayotgan Ekvatorial Gvineya terma jamoasi o‘tgan yili o‘zi mezbonlik qilgan Afrika Millatlar Kubogi musobaqasida yarim finalga qadar yetib borgan.

Eslatib o‘tamiz, O‘zbekiston hamda Ekvatorial Gvineya terma jamoalari o‘rtasidagi o‘rtoqlik uchrashuvi 2-iyun kuni Toshkentdagi “Bunyodkor” stadionida bo‘lib o‘tadi. Uchrashuv soat 19:00 da boshlanishi rejalashtirilgan.

• O‘zbekiston milliy terma jamoasi Kanadaga qarshi o‘rtoqlik o‘yini o‘tkazadi

Ekvatorial Gvineya terma jamoasining O‘zbekistonga qarshi o‘rtoqlik o‘yini uchun taklif etilgan futbolchilari ro‘yxati:

Darvozabonlar: Felipe Ovono (“Orlando Payrets”, JAR), Migel Eyoma (“Bata”).

Himoyachilar: Karlos Akapo (“Valensiya Mestalya”, Ispaniya), Marselo Asumu (“Deportivo Unidad”), Igor Engonga (“Portugalet”, Ispaniya), Eloy Edu (“Sent Endryus”, Malta), Diosdado Mbele (“Xaybernian”, Malta), Jeyms Boriko (“Malyorka B”, Ispaniya), Eugenio Mbomio (“Deportivo Mongomo”).

Yarim himoyachilar: Frederiko Bikoro (“Soni de Ela Nguyema”), Ivan Zarandona (“Burgos”, Ispaniya), Maksimo Ndongo (“Rasing de Misomeseng”), Viyeyra Ellong (“Kerkira”, Gretsiya), Silveriu Obiyang (“Akonanguy”), Kristobal Alogo (“Soni de Ela Nguyema”), Federiko Nsuye (“Malyorka B” , Ispaniya).

Hujumchilar: David Mitogo (“Barko”, Ispaniya), Enrike Boula (“Linares Deportivo”, Ispaniya), David Ortli (“Lazzsports”, Ispaniya), Salvador Edu (“Valensiya Mestalya”, Ispaniya).