21-may, Qozog‘istonda Yer kodeksiga kiritilgan tuzatishlarga qarshi ruxsat berilmagan mitinglar o‘tkazilishi kerak bo‘lgan kunda, mamlakatda yana ommabop internet-servislarning bir qismi uzib qo‘yildi, deb yozadi TJournal bir necha mahalliy fuqarolarga tayanib.
Mahalliy vaqt bilan taxminan 12:00 atrofida (Toshkent vaqti bilan 11:00) butun Qozog‘istonda Google’ning qator servislariga ulanishda muammolar kuzatilgan. Ko‘pchilikda YouTube yuklanmagan, ba’zilarda Gmail pochtasi va Google qidiruv xizmati ishlamagan.
Google servislariga ulanishda muammo bo‘lganini qidiruv tizimining o‘z instrumentlari ham tasdiqladi. Grafikka ko‘ra, Toshkent vaqti bilan taxminan 10:30 da Google servislariga trafik keskin tushib ketgan, bu organik tarzda bo‘lmagani aniq.
21-may kuni ertalab Qozog‘istonning bir qator shaharlarida miting ishtirokchilari qo‘lga olingan edi. Yer kodeksiga kiritilgan tuzatishlar yerlarni xorijliklarga uzoq vaqtlik ijara ostida sotishni niqoblashga urinish sifatida qabul qilinmoqda.
Qozog‘istonda 20-may, juma kuni ham Toshkent vaqti bilan 2:00 dan 3:00 gacha yirik xalqaro servislar, jumladan, Facebook, Twitter, “VKontakte”, WhatsApp, Viber va YouTube ochilishdan to‘xtagan, Telegram qisman ishlagan edi.
Eslatib o‘tamiz, oldinroq Qozog‘iston prezidenti Nursulton Nazarboyev Yer kodeksiga kiritilayotgan tuzatishlar mohiyatini aholiga yetkazib berolmagani uchun milliy iqtisodiyot va qishloq xo‘jaligi vazirlari, hukmron “Nur Otan” partiyasidagi o‘rinbosarini iste’foga chiqargani haqida xabar berilgandi.
Izoh (0)