Ispaniyaning Inditex kompaniyasi Zara brendi o‘lchamlari qatorini kengaytirdi va to‘lishgan ayollar uchun XXL o‘lchamini joriy etdi. Bu haqda “RBK” xabar bermoqda.
Avvaliga katta o‘lchamlar Zara’ning ayrim kolleksiyalarida paydo bo‘ladi, biroq kompaniya keyinchalik brendning aksariyat to‘plamlariga XXL o‘lchamlarni kiritishni rejalashtirmoqda. Hozir Zara’da uchratish mumkin bo‘lgan eng katta o‘lcham XL, ayrim kolleksiyalar esa L bilan cheklangan.
Het Nieuwsblad nashrining ma’lum qilishicha, Zara o‘lchamlari qatorini kengaytirishiga salkam 100 ming imzo to‘plashga muvaffaq bo‘lgan Kataloniya fuqarosi Anna Riyeraning shikoyati sabab bo‘lgan. Ayol “46-o‘lcham katta emas, me’yordagi ekanligi”ni ma’lum qilib, Zara’da “qotib qolgan tasavvurlar uchun emas, odamlar uchun kiyimlar paydo bo‘lishi”ni talab qilgan.
Zara tomonidan sotilgan XXL o‘lchamdagi birinchi buyum ko‘k kofta bo‘ldi: libos internet-do‘konda paydo bo‘lgan kuni xaridorini topdi.
Izoh (0)