21 май, Қозоғистонда Ер кодексига киритилган тузатишларга қарши рухсат берилмаган митинглар ўтказилиши керак бўлган кунда, мамлакатда яна оммабоп интернет-сервисларнинг бир қисми узиб қўйилди, деб ёзади TJournal бир неча маҳаллий фуқароларга таяниб.
Маҳаллий вақт билан тахминан 12:00 атрофида (Тошкент вақти билан 11:00) бутун Қозоғистонда Google’нинг қатор сервисларига уланишда муаммолар кузатилган. Кўпчиликда YouTube юкланмаган, баъзиларда Gmail почтаси ва Google қидирув хизмати ишламаган.
Google сервисларига уланишда муаммо бўлганини қидирув тизимининг ўз инструментлари ҳам тасдиқлади. Графикка кўра, Тошкент вақти билан тахминан 10:30 да Google сервисларига трафик кескин тушиб кетган, бу органик тарзда бўлмагани аниқ.
21 май куни эрталаб Қозоғистоннинг бир қатор шаҳарларида митинг иштирокчилари қўлга олинган эди. Ер кодексига киритилган тузатишлар ерларни хорижликларга узоқ вақтлик ижара остида сотишни ниқоблашга уриниш сифатида қабул қилинмоқда.
Қозоғистонда 20 май, жума куни ҳам Тошкент вақти билан 2:00 дан 3:00 гача йирик халқаро сервислар, жумладан, Facebook, Twitter, «ВKонтакте», WhatsApp, Viber ва YouTube очилишдан тўхтаган, Telegram қисман ишлаган эди.
Эслатиб ўтамиз, олдинроқ Қозоғистон президенти Нурсултон Назарбоев Ер кодексига киритилаётган тузатишлар моҳиятини аҳолига етказиб беролмагани учун миллий иқтисодиёт ва қишлоқ хўжалиги вазирлари, ҳукмрон «Нур Отан» партиясидаги ўринбосарини истеъфога чиқаргани ҳақида хабар берилганди.
Изоҳ (0)