O‘zbekiston Respublikasi Prezidenti Islom Karimov 16-may kuni “Koreya Respublikasi bilan savdo-iqtisodiy, investitsiya va moliyaviy hamkorlikni yanada kengaytirish chora-tadbirlari to‘g‘risida”gi qarorni imzoladi. Bu haqda Qimmatli qog‘ozlar bozorini muvofiqlashtirish va rivojlantirish markazi manbalariga tayanib, “Gazeta.uz” xabar bermoqda.
Hujjatda Koreya fond birjasi ko‘magida 27—29-aprel kunlari Seulda o‘tkazilgan O‘zbekiston—Koreya biznes-forumi yakunlariga ko‘ra istiqbolli investitsiya loyihalarini tayyorlash, koreyalik investorlarga O‘zbekiston aksiyadorlik jamiyatlaridagi davlat va xo‘jalik boshqaruvi organlari ulushini realizatsiya qilish yuzasidan shartnoma hamda kelishuvlarga erishilgani ta’kidlangan.
Xususan, Seulda 2016-yil davomida yetakchi koreys kompaniyalariga “O‘ztemiryo‘lkonteyner” (15% ulush 4,5 million dollar evaziga), “Sarbon neftgaz” (51%, 3,8 million dollar), “O‘zqishloqxo‘jalikmashlizing” (15%, 7,8 million dollar), “Xovrenko nomidagi Samarqand vino kombinati” (20,18%, 2,6 million dollar), “Ravnaqbank” (15%, 0,5 million dollar) va yana to‘rtta AJdagi davlat hamda xo‘jalik boshqaruvi organlari ulushini realizatsiya qilish bo‘yicha uzil-kesil kelishuvga erishildi.
Shuningdek, koreys kompaniyalari va banklariga “O‘zsanoatqurilishbank” (15%, 63,6 million dollar), “Asakabank” (15%, 58 million dollar), “Aloqabank” (47,54%, 42,7 million dollar), “O‘zekspomarkaz” (38,3%, 24,9 million dollar), “Xalqaro hamkorlik markazi” (29,9%, 32,2 million dollar) va yana to‘rtta AJ ustav kapitalidagi ulushlarni realizatsiya qilish bo‘yicha memorandum hamda bayonnomalar imzolandi.
Ushbu hujjatlarning amalga oshirilish muddati sifatida 2016—2017-yillar belgilangan. Ko‘rsatilgan muddatlarda xorijiy investorlarga realizatsiya qilinmagan taqdirda, aksiyalar ochiq savdolarda sotilishi mumkin.
Qaror bilan Toshkentda 2015-yil 5—6-noyabr kunlari bo‘lib o‘tgan Xalqaro investitsiya forumida erishilgan kelishuvlar yakunlari bo‘yicha davlat, xo‘jalik boshqaruvi organlari va xo‘jalik jamiyatlari aktivlarini realizatsiya qilish tadbirlari Rejasining tegishli ko‘rsatmalari bekor qilindi.
Izoh (0)