Ўзбекистон Республикаси Президенти Ислом Каримов 16 май куни «Корея Республикаси билан савдо-иқтисодий, инвестиция ва молиявий ҳамкорликни янада кенгайтириш чора-тадбирлари тўғрисида»ги қарорни имзолади. Бу ҳақда Қимматли қоғозлар бозорини мувофиқлаштириш ва ривожлантириш маркази манбаларига таяниб, «Газета.uz» хабар бермоқда.
Ҳужжатда Корея фонд биржаси кўмагида 27—29 апрель кунлари Сеулда ўтказилган Ўзбекистон—Корея бизнес-форуми якунларига кўра истиқболли инвестиция лойиҳаларини тайёрлаш, кореялик инвесторларга Ўзбекистон акциядорлик жамиятларидаги давлат ва хўжалик бошқаруви органлари улушини реализация қилиш юзасидан шартнома ҳамда келишувларга эришилгани таъкидланган.
Хусусан, Сеулда 2016 йил давомида етакчи корейс компанияларига «Ўзтемирйўлконтейнер» (15% улуш 4,5 миллион доллар эвазига), «Сарбон нефтгаз» (51%, 3,8 миллион доллар), «Ўзқишлоқхўжаликмашлизинг» (15%, 7,8 миллион доллар), «Ховренко номидаги Самарқанд вино комбинати» (20,18%, 2,6 миллион доллар), «Равнақбанк» (15%, 0,5 миллион доллар) ва яна тўртта АЖдаги давлат ҳамда хўжалик бошқаруви органлари улушини реализация қилиш бўйича узил-кесил келишувга эришилди.
Шунингдек, корейс компаниялари ва банкларига «Ўзсаноатқурилишбанк» (15%, 63,6 миллион доллар), «Асакабанк» (15%, 58 миллион доллар), «Алоқабанк» (47,54%, 42,7 миллион доллар), «Ўзэкспомарказ» (38,3%, 24,9 миллион доллар), «Халқаро ҳамкорлик маркази» (29,9%, 32,2 миллион доллар) ва яна тўртта АЖ устав капиталидаги улушларни реализация қилиш бўйича меморандум ҳамда баённомалар имзоланди.
Ушбу ҳужжатларнинг амалга оширилиш муддати сифатида 2016—2017 йиллар белгиланган. Кўрсатилган муддатларда хорижий инвесторларга реализация қилинмаган тақдирда, акциялар очиқ савдоларда сотилиши мумкин.
Қарор билан Тошкентда 2015 йил 5—6 ноябрь кунлари бўлиб ўтган Халқаро инвестиция форумида эришилган келишувлар якунлари бўйича давлат, хўжалик бошқаруви органлари ва хўжалик жамиятлари активларини реализация қилиш тадбирлари Режасининг тегишли кўрсатмалари бекор қилинди.
Изоҳ (0)