“O‘zbekyengilsanoat” aksiyadorlik jamiyati sohaning eksport salohiyatini oshirish va ushbu yo‘nalishdagi o‘quv muassasalari bitiruvchilarini ish bilan ta’minlashga bag‘ishlangan matbuot anjumani o‘tkazdi. Unda aksiyadorlik jamiyatining yetakchi mutaxassislari, tarmoq korxonalari, Toshkent to‘qimachilik va yengil sanoat instituti vakillari ishtirok etdi. Bu haqda O‘zA xabar bermoqda.
Joriy yilning yanvar—mart oylarida tarmoq korxonalari tomonidan 18 turdagi yangi mahsulot ishlab chiqarish o‘zlashtirilib, 178 turdagi yengil sanoat tovarlari – 3,1 million kvadrat metr mato, 24 modeldagi 5,8 million dona tayyor tikuvchilik va trikotaj mahsulotlari ishlab chiqarildi.
Ishlab chiqarish ko‘rsatkichlarining o‘sishi eksport hajmining kengayishi bilan bog‘liq. Bugungi kunda “O‘zbekyengilsanoat” aksiyadorlik jamiyati korxonalari mahsulotlari Yevropa, Osiyo, Shimoliy va Janubiy Amerikadagi 55 mamlakatga eksport qilinmoqda. Joriy yil birinchi choragi yakunlariga ko‘ra, eksport qilingan mahsulotlar miqdori 206,1 million dollarga yetdi. Bu 2015-yilning shu davriga nisbatan 6,2 foiz ko‘p. Shu yilning oxirigacha tarmoqda eksport hajmini yanada kengaytirish bo‘yicha qo‘shimcha chora-tadbirlar amalga oshiriladi.
— Joriy yilda bitiruvchilarni ish bilan ta’minlash maqsadida oliy o‘quv yurtimizda bo‘sh ish o‘rinlari yarmarkasi o‘tkazildi, — deydi Toshkent to‘qimachilik va yengil sanoat instituti prorektori A.G‘ulomov. — Unda tarmoqning Uztex kompaniyalar guruhi, Rieter Uzbekistan xorijiy korxonasi, “Alkim tekstil”, “Nonna tekstil” kabi 50 ga yaqin korxonasi ishtirok etdi. Joriy yilgi innovatsion yarmarkada institut talabalari beshta istiqbolli ishlanmani namoyish qildi.
Izoh (0)