O‘zbekiston muzeylari 18-may, chorshanba kuni Xalqaro muzeylar kuni munosabati bilan ochiq eshiklar kunini o‘tkazadi. Bu haqda “Gazeta.uz” xabar bermoqda.
Madaniyat va sport ishlari vazirligi tasaruffida bo‘lgan barcha muzeylar, boshqa muassasalarga qarashli aksariyat muzeylar kabi, bepul xizmat ko‘rsatadi. Muzeylarda turli aksiyalar va tadbirlar bo‘lib o‘tishi ham rejalashtirilgan.
Jumladan, O‘zbekiston tarixi davlat muzeyida bolalar ijodiyoti, Tabiat muzeyida shaxsiy ko‘rgazma, Davlat san’at muzeyida mamlakat yosh rassomlari ishlari namoyishi, Nukusdagi Savitskiy nomli muzeyda sanaga bag‘ishlangan konsert, Aloqa tarixi muzeyida televizor va teleminoralarga bag‘ishlangan yangi ekspozitsiya tashkil etiladi. Shuningdek, Temir yo‘l texnikasi, Geologiya, Qurolli kuchlar va boshqa muzeylar ham bepul ishlaydi.
O‘tgan yili faoliyatini boshlagan Toshkent politexnika muzeyi ham o‘zining ilk muzeylar kunida 21:00 ga qadar ochiq bo‘ladi, 18:30 da kirish pullik bo‘lgan shou boshlanadi.
Izoh (0)