AQSh Kongressi senati mamlakat fuqarolariga 2001-yil 11-sentabr teraktlariga aloqadorlik ayblovi bo‘yicha Saudiya Arabistoniga qarshi Amerika sudlariga da’vo berishga ruxsat etuvchi qonun loyihasini bir ovozdan ma’qulladi, deb yozadi “TASS”.
“Terrorizm hamkorlariga nisbatan adolat to‘g‘risida”gi tashabbus muallifi va nufuzli demokrat senator Charlz Shumer ta’kidlashicha, qonun loyihasi “ketma-ket teraktlar qurbonlari oilalariga, hech bo‘lmaganda, kichik adolat chorasi ko‘rilishiga erishish imkonini beradi”.
Endi tashabbus vakillar palatasi tomonidan ma’qullanishi kerak, shundan so‘ng u AQSh prezidenti Barak Obamaga yuboriladi, u esa qonun loyihasiga veto qo‘yishini aytib bo‘lgan. “Bu faqat Amerika-Saudiya aloqalari muammosi emas, — dedi u. — Bu AQShning boshqa mamlakatlar bilan hamkorlikka umumiy yondashuvi muammosidir. Agar biz AQShda xorijiy mamlakatlar hukumatlariga qarshi yakka tartibda da’volar berish imkoniyatini yaratsak, boshqa davlatlar fuqarolari ham doimiy ravishda o‘z sudlariga AQShga qarshi da’volar bilan murojaat qiladi”.
Izoh (0)