Xitoyning Shanxay shahrida Xalqaro yengil atletika federatsiyasi taqvimidan o‘rin olgan “Brilliant liga” musobaqasining ikkinchi bosqich bellashuvlari o‘z yakuniga yetdi. Ushbu musobaqada ishtirok etgan o‘zbekistonlik Nadiya Dusanova balandlikka sakrash sektorida 1,94 metr natijani qayd etib, Rio–2016 Olimpiada o‘yinlariga yo‘llanma oldi, deb xabar bermoqda “Sports.uz”.
Ayollar o‘rtasida balandlikka sakrash sektorida bahs olib borgan Nadiya Dusanova 1,94 metr balandlikni qayd etibgina qolmay, Olimpiada normativini ham bajardi. Ushbu natija Nadiyaga musobaqaning kumush medalini taqdim etdi. Sent-Lyusiya vakilasi Levern Spenser 1,94 metr balandlikni birinchi urinishda, Dusanova uchinchi urinishda zabt etgani bois o‘zbekistonlik sportchiga ikkinchi o‘rin nasib etdi.
Mazkur yo‘nalishdagi bellashuvlarda yana bir O‘zbekiston vakilasi — Svetlana Radzivil ham ishtirok etdi. Rio–2016 Olimpiada o‘yinlari yo‘llanmasini avvalroq naqd qilib qo‘ygan Radzivil bu safar 1,88 metr balandlik bilan to‘rtinchi natijani qayd etdi.
“Brilliant liga”, Shanxay
Balandlikka sakrash, ayollar
- Levern Spenser (Sent-Lyusiya) – 1,94 metr
- Nadiya Dusanova (O‘zbekiston) – 1,94 metr
- Ana Simich (Xorvatiya) – 1,92 metr
- Svetlana Radzivil (O‘zbekiston) – 1,88 metr
Qayd etish joiz, 16-may holatiga ko‘ra, 7—18-sentabrda o‘tkaziladigan XV yozgi Paralimpiya o‘yinlariga o‘zbekistonlik sportchilar tomonidan 25 ta yo‘llanma qo‘lga kiritilgan.
Izoh (0)