Rossiya prezidenti Vladimir Putinning Sochiga tashrifi chog‘ida unga eng zamonaviy harbiy texnika namoyish etildi: ekskursiyani o‘tkazayotgan general-leytenant Aleksandr Shevchenko yangi “UAZ-Patriot” harbiy mashinasini ochaman deb eshik dastasini uzib oldi, deb xabar bermoqda TJournal.
“UAZ-Patriot”ni tavsiflar ekan, general u oddiy yo‘llarda harakatning boshqa ishtirokchilariga bildirmasdan harakatlana olishini, pikapga pulemyot, stanokli granatamyot o‘rnatish mumkinligini, kuzovda snaryad saqlovchi joy borligini aytib o‘tdi.
Putin kabinaga yaqinlashib, eshikni ochmoqchi bo‘ldi, ammo buning uddasidan chiqa olmadi. Unga yordamga oshiqqan Shevchenko dastani bir necha marta tortdi, natijada u uzilib tushdi.
“Yasha, azamat (molodets)”, — dedi Putin kulib, general esa ochiq oyna orqali dastani o‘rindiqqa qo‘yib qo‘ydi.
Voqea qayd etilgan videolavha Life nashri tomonidan chop etildi.
Qayd etish joiz, RT telekanali tomonidan voqea joyidan tayyorlangan videolavhada bu sahnalar namoyish etilmadi.
Izoh (0)