Germaniyaning Volkswagen avtomobilsozlik konserni 2015-yilda “dizel mojarosi” oqibatlarini bartaraf etish uchun ajratilgan mablag‘lar tufayli, 1,3 milliard yevro miqdorida zarar ko‘rgani haqida hisobot berdi, deb yozadi “Interfaks”. Bir yil avval esa kompaniya 14,79 milliard yevro foyda ko‘rgan edi.
Kompaniya press-relizida aytilishicha, u sud xarajatlari, avtomobillarni qaytarib olish uchun sarflar va mijozlarga tovon pullari kabi mojaro bilan bog‘liq chiqimlar uchun 16,2 milliard yevro zaxira qilib qo‘ygan.
Shu va boshqa bir martalik omillarni hisobga olmaganda, kompaniyaning operatsion foydasi 12,8 milliard yevroni tashkil qildi.
Volkswagen’ning daromadi esa 5,4 foizga o‘sib, 213,3 milliard yevroga teng bo‘ldi.
O‘tgan yilda konsern jami 9,9 millionta avtomobil sotdi, bu undan oldingi yildagidan 2 foizga kam demakdir.
Eslatib o‘tamiz, 2015-yil sentabr oyi oxirida Volkswagen’ning dizel dvigatellari atrofida katta mojaro kelib chiqdi. Kompaniya o‘zining 11 million avtomobiliga noqonuniy dasturiy ta’minot o‘rnatganini tan oldi.
AQSh atrof-muhit muhofazasi agentligi va Kaliforniya havo resurslari kengashi 2014—2016-yillar modellar qatoriga mansub Volkswagen, Audi va Porsche mashinalarini testdan o‘tkazish chog‘ida ko‘rsatilgan zararli tashlanmalar hajmi mazkur transport vositalaridan foydalanish paytida qayd etilganidan kam bo‘lganini aniqlagan edi.
Keyinroq AQSh adliya vazirligi Volkswagen’ni Toza havo to‘g‘risidagi qonun (Clean Air Act)ning to‘rtta bandini buzishda ayblab, sudga berdi.
Izoh (0)