Германиянинг Volkswagen автомобилсозлик концерни 2015 йилда «дизель можароси» оқибатларини бартараф этиш учун ажратилган маблағлар туфайли, 1,3 миллиард евро миқдорида зарар кўргани ҳақида ҳисобот берди, деб ёзади «Интерфакс». Бир йил аввал эса компания 14,79 миллиард евро фойда кўрган эди.
Компания пресс-релизида айтилишича, у суд харажатлари, автомобилларни қайтариб олиш учун сарфлар ва мижозларга товон пуллари каби можаро билан боғлиқ чиқимлар учун 16,2 миллиард евро захира қилиб қўйган.
Шу ва бошқа бир марталик омилларни ҳисобга олмаганда, компаниянинг операцион фойдаси 12,8 миллиард еврони ташкил қилди.
Volkswagen’нинг даромади эса 5,4 фоизга ўсиб, 213,3 миллиард еврога тенг бўлди.
Ўтган йилда концерн жами 9,9 миллионта автомобиль сотди, бу ундан олдинги йилдагидан 2 фоизга кам демакдир.
Эслатиб ўтамиз, 2015 йил сентябрь ойи охирида Volkswagen’нинг дизель двигателлари атрофида катта можаро келиб чиқди. Компания ўзининг 11 миллион автомобилига ноқонуний дастурий таъминот ўрнатганини тан олди.
АҚШ атроф-муҳит муҳофазаси агентлиги ва Калифорния ҳаво ресурслари кенгаши 2014—2016 йиллар моделлар қаторига мансуб Volkswagen, Audi ва Porsche машиналарини тестдан ўтказиш чоғида кўрсатилган зарарли ташланмалар ҳажми мазкур транспорт воситаларидан фойдаланиш пайтида қайд этилганидан кам бўлганини аниқлаган эди.
Кейинроқ АҚШ адлия вазирлиги Volkswagen’ни Тоза ҳаво тўғрисидаги қонун (Clean Air Act)нинг тўртта бандини бузишда айблаб, судга берди.
Изоҳ (0)