Ravon R2 ихчам хэтчбеки Россиядаги дилерларга апрель охиригача етказилиши керак эди, аммо объектив сабабга кўра, етказиб бериш жараёни кечикиб қолди, деб ёзади «Колёса» нашри.
«Бунгача Ўзбекистондан Россияга барча автомобиллар темир йўл орқали етказиб берилар эди, — дея изоҳлашди компания матбуот хизматидагилар. — Темир йўл орқали ташиш тарифлари кескин ошиб кетди. Бу туфайли автомобиллар нархи ҳам ошиши муқаррар эди». Шу сабабли янги автомобилни ташишнинг бошқа усули топилди.
Ravon R2’нинг биринчи партияси Россияга автовоз (автомобиль ташувчи юк машинаси)ларда етказилади. Бундай ечим моделнинг аввал эълон қилинган нархини сақлаб қолиш имконини берди. Қолган партиялар нархи қандай ўзгариши маълум қилинмаяпти.
Аввалроқ Ravon R2 автомобили Россияда 10 апрель — дастлабки буюртмалар қабул қилина бошлаганидан бир ой ўтиб, савдога чиқиши хабар берилган эди.
Эслатиб ўтамиз, автомобилнинг 1,25 литрли, 4 цилиндрли, 85,5 от кучига эга двигатель ва минимал комплектациядаги Comfort AT версияси баҳоси 369 минг рубл (тахминан 5600 доллар)дан бошланади.
Optimum AT версиясида харидор иккита ўрнига тўртта хавфсизлик ёстиқчаси, эшикларни блокировка қилиш тугмалари, пассив сигнализация, борт компьютери, кондиционер ва бошқа қулайликларга эга бўлади. Бундай машина нархи 439 минг рублдан (6680 доллар атрофида) бошланади.
Elegant деб номланган максимал комплектацияда олдинги версияларга қўшимча олтита хавфсизлик ёстиқчаси, олдинги ўриндиқларнинг иситилиши, олти колонкали аудиотизим, тўртта эшикда электр ойна кўтаргичлар, рулга ўрнатилган аудиотизимни бошқариш пульти таклиф этилади. Бундай автомобилга 469 минг рубль (7150 доллар атрофида) ва ундан юқори нарх белгиланган.
Изоҳ (0)