Toshkentning Abdurauf Fitrat va Sodiqjon Tolipov ko‘chalarini ajratib turuvchi temiryo‘l kesishmasida Matiz avtomobili yo‘l harakati qoidalarini qo‘pol ravishda buzishi natijasida halokatli yo‘l-transport hodisasi yuz berishiga bir bahya qoldi.
Facebook’dagi “Voditeli Tashkenta” guruhida e’lon qilingan suratda Matiz temiryo‘l shlagbaumi tushirilib, kesishmani to‘suvchi qurilma ko‘tarilguniga qadar kesishma ichiga kirgani, biroq qarama-qarshi tomondagi to‘suvchi qurilmadan o‘ta olmaganini ko‘rish mumkin — poyezd shundoqqina Matiz’ning ortidan o‘tib ketgan.
Guruh a’zolari mazkur holatni keskin tanqid qilgan. Ayni vaqtda, kesishma yaqinida istiqomat qiluvchi foydalanuvchilarning yozishicha, bu yerda shunday holatlar tez-tez yuz berib turadi.
Yo‘l harakati qoidalarining 118-bandiga ko‘ra, shlagbaum yopiq turgan yoki yopila boshlagan holatda, kesishmani to‘suvchi qurilma ko‘tarilib turgan yoki ko‘tarila boshlagan holatda, shlagbaum holatidan qat’i nazar, svetoforning taqiqlovchi ishorasida, agar ko‘rinish chegarasidagi masofada kesishmaga poyezd yaqinlashib kelayotgan bo‘lsa avtomobillarning temiryo‘l kesishmasiga kirishi taqiqlanadi. Bundan tashqari, kesishma oldida turgan transport vositalarini qarama-qarshi harakatlanish bo‘lagiga chiqib aylanib o‘tish ham taqiqlanadi.
Ma’lumot uchun, Ma’muriy javobgarlik to‘g‘risidagi kodeksning 130-moddasi 1-qismiga muvofiq, haydovchilarning temiryo‘l o‘tish joylaridan o‘tish qoidalarini buzishi eng kam ish haqining uch baravari (20-aprel holatiga ko‘ra — 390 720 so‘m) miqdorida jarima solinishiga sabab bo‘ladi.
Izoh (0)