Goldman Sachs 2008 йилги инқирозни келтириб чиқарган битимлар учун 5 млрд доллар тўлайди

Американинг Goldman Sachs банки 2008 йилда молиявий инқирозга олиб келган ипотека облигациялари бўйича битимлар ҳақидаги ишни тартибга солиш доирасида 5,06 миллиард доллар тўлашга рози бўлди, дея хабар бермоқда «РБК» АҚШ адлия вазирлигига таяниб. Ушбу маблағнинг 1,8 миллиард долларини Goldman Sachs жабрланган қарз олувчиларни қўллаб-қувватлашга йўналтиради.

Муассаса баёнотида айтилишича, муроса битими АҚШ ҳукуматида Goldman Sachs’га нисбатан жиноят иши қўзғатиш ҳуқуқини сақлаб қолади ва банк вакилларини жиноий ёки маъмурий жавобгарлик имкониятидан маҳрум этмайди.

Битим доирасида Goldman Sachs 2005—2007 йилларда ипотека қимматбаҳо қоғозларининг потенциал инвесторларини чалғитганини тан олишга рози бўлди. Банк уларни облигациялар сифатли ипотека кредитлари билан таъминланганини айтиб ишонтирган, аслида эса банк ушбу кредитлар тўланмаслигини билган. Бунинг натижасида бундай облигацияларга сармоя киритганлар миллиардлаб зарар кўрган.