Yovvoyi tabiatdagi yo‘lbarslar soni keyingi bir necha o‘n yil mobaynida birinchi bor ko‘paygani qayd etildi: ularning soni 2010-yildagi 3,2 mingdan salkam 3,9 mingtaga yetgan. Bu haqda Butundunyo yovvoyi tabiat fondi (WWF) va hukumatlararo “Global yo‘lbars forumi” tashkiloti ma’lum qilgan, deya xabar beradi “RIA Novosti”.
“Keyingi o‘n yilliklar davomida ilk bor yo‘lbarslar soni kamaymadi, balki oshib bormoqda. Bu bizga umid baxsh etib, rasmiylar, mahalliy aholi va mutaxassislar yakdil bo‘lsa, noyob turlar va ular yashaydigan joylarni saqlab qolish mumkinligini ko‘rsatmoqda”, — deya ta’kidlagan WWF xalqaro kotibiyati bosh direktori Marko Lambertini.
So‘nggi ma’lumotlarga ko‘ra, yo‘lbarslar eng ko‘p Hindiston (2226), Rossiya (523—540), Indoneziya (371), Malayziya (250), Nepal (198) va Tailandda (189) istiqomat qiladi. Shuningdek, Bangladesh, Butan, Vyetnam, Kambodja, Xitoy, Laos va Myanma ham yo‘lbarslar mavjud mamlakatlar qatoriga kiradi.
“Yo‘lbarslar soni oshganining bir qator sabablari bor. Avvalo, bu yirtqichlar va ular yashaydigan manzillar qo‘riqlanishi kuchaytirilgani bilan bog‘liq. Yo‘lbarslar soni Rossiya, Hindiston, Nepal va Butanda ko‘paygani kuzatilgan. Qolaversa, 2013—2015-yillarda besh davlatda yirtqichlarning hisob-kitobi amalga oshirildi va bu ularning soniga aniqlik kiritish imkonini berdi”, — deya izoh bergan fond vakillari.
Izoh (0)