Ёввойи табиатдаги йўлбарслар сони кейинги бир неча ўн йил мобайнида биринчи бор кўпайгани қайд этилди: уларнинг сони 2010 йилдаги 3,2 мингдан салкам 3,9 мингтага етган. Бу ҳақда Бутундунё ёввойи табиат фонди (WWF) ва ҳукуматлараро «Глобал йўлбарс форуми» ташкилоти маълум қилган, дея хабар беради «РИА Новости».
«Кейинги ўн йилликлар давомида илк бор йўлбарслар сони камаймади, балки ошиб бормоқда. Бу бизга умид бахш этиб, расмийлар, маҳаллий аҳоли ва мутахассислар якдил бўлса, ноёб турлар ва улар яшайдиган жойларни сақлаб қолиш мумкинлигини кўрсатмоқда», — дея таъкидлаган WWF халқаро котибияти бош директори Марко Ламбертини.
Сўнгги маълумотларга кўра, йўлбарслар энг кўп Ҳиндистон (2226), Россия (523—540), Индонезия (371), Малайзия (250), Непал (198) ва Таиландда (189) истиқомат қилади. Шунингдек, Бангладеш, Бутан, Вьетнам, Камбоджа, Хитой, Лаос ва Мьянма ҳам йўлбарслар мавжуд мамлакатлар қаторига киради.
«Йўлбарслар сони ошганининг бир қатор сабаблари бор. Аввало, бу йиртқичлар ва улар яшайдиган манзиллар қўриқланиши кучайтирилгани билан боғлиқ. Йўлбарслар сони Россия, Ҳиндистон, Непал ва Бутанда кўпайгани кузатилган. Қолаверса, 2013—2015 йилларда беш давлатда йиртқичларнинг ҳисоб-китоби амалга оширилди ва бу уларнинг сонига аниқлик киритиш имконини берди», — дея изоҳ берган фонд вакиллари.
Изоҳ (0)