Rossiyaning “Birinchi kanal”i bosh direktori Konstantin Ernst, katta ehtimol bilan, Rossiyaga norasmiy tarzda keltirilgan iPhone SE smartfonidan foydalanmoqda, deb yozadi “Hi-tech.mail.ru”.
Gap shundaki, Apple’ning yangi smartfoni Rossiyada 5-aprelda sotila boshladi, gadjetni esa kanal rahbarining qo‘lida 3-aprelda bo‘lib o‘tgan “Quvnoqlar va zukkolar” o‘yini chog‘ida ko‘rishgan.
O‘yin videosidan olingan kadrda u aynan 4 dyuymli ekranga ega ekanligi ko‘rinib turibdi. Bunday ekranli qurilmalarni kompaniya bir necha marta chiqargan, ammo ulardan hech biri, iPhone SE’dan tashqari, “pushti tillarang” tusda taqdim etilmagan.
Eslatib o‘tamiz, 21-martda rasman namoyish etilgan iPhone SE 12 megapikselli qo‘sh vspishkali kamera bilan jihozlangan, u 63 megapikselgacha bo‘lgan panoramali tasvirni tushirish, shuningdek, 4K sifatidagi videolarni olishga qodir. Apple qurilmada ancha tezkorroq Wi-Fi va LTE bo‘lishini, batareyasi esa iPhone 5S’dan ko‘ra ko‘proq vaqt ishlashini va’da qilmoqda.
iPhone SE’ning narxi 16 gigabaytli versiya uchun 399, 64 gigabaytlisi uchun esa 499 dollarni tashkil etadi. Smartfon uchun oldindan buyurtmalar 24-martda ochiladi, savdolar esa 31-martda boshlanadi.
Izoh (0)