Rossiyaning “Kogalimavia” aviakompaniyasiga tegishli Airbus-321 yo‘lovchi laynerining 2015-yil 31-oktabrdagi halokati sabablarini o‘rganish bo‘yicha tekshiruv yakunlari aprelda ma’lum bo‘ladi, deya xabar bermoqda “Interfaks” Misr turizm vaziri o‘rinbosari Muhammad Abduljabborga tayanib.
Uning ta’kidlashicha, Misr aeroportlaridagi xavfsizlik choralarini o‘rganish uchun mamlakatga Rossiya va Buyuk Britaniya kabi qator mamlakatlarning tegishli tuzilmalari vakillari taklif qilingan. Misrning barcha aeroportlarida xavfsizlik choralari Fuqarolik aviatsiyasi xalqaro tashkiloti qoidalari va standartlariga muvofiq tarzda tashkil qilinganligi aniqlangan.
U Rossiya laynerining halokatidan so‘ng Misr sayyohlik sohasida ba’zi qiyinchiliklarga uchraganini qo‘shimcha qildi. “Rossiya Misrga kelayotgan sayyohlar oqimining eng katta qismini tashkil etardi. Rossiyalik sayyohlarning umumiy soni 3,5 milliondan oshardi, bu ko‘rsatkich keskin tushib ketdi”, — dedi u.
Eslatib o‘tamiz, 2015-yilning 31-oktabr kuni Rossiyaning “Kogalimavia” kompaniyasiga tegishli Airbus A321 samolyoti Sinayda quladi. Bortda bo‘lgan 217 yo‘lovchi va ekipajning yetti nafar a’zosi halok bo‘ldi. Misr prezidenti fevral oyida A321 layneri halokatiga terakt sababchi bo‘lganligini birinchi marta tan oldi.
Izoh (0)