Россиянинг «Когалимавиа» авиакомпаниясига тегишли Airbus-321 йўловчи лайнерининг 2015 йил 31 октябрдаги ҳалокати сабабларини ўрганиш бўйича текширув якунлари апрелда маълум бўлади, дея хабар бермоқда «Интерфакс» Миср туризм вазири ўринбосари Муҳаммад Абдулжабборга таяниб.
Унинг таъкидлашича, Миср аэропортларидаги хавфсизлик чораларини ўрганиш учун мамлакатга Россия ва Буюк Британия каби қатор мамлакатларнинг тегишли тузилмалари вакиллари таклиф қилинган. Мисрнинг барча аэропортларида хавфсизлик чоралари Фуқаролик авиацияси халқаро ташкилоти қоидалари ва стандартларига мувофиқ тарзда ташкил қилинганлиги аниқланган.
У Россия лайнерининг ҳалокатидан сўнг Миср сайёҳлик соҳасида баъзи қийинчиликларга учраганини қўшимча қилди. «Россия Мисрга келаётган сайёҳлар оқимининг энг катта қисмини ташкил этарди. Россиялик сайёҳларнинг умумий сони 3,5 миллиондан ошарди, бу кўрсаткич кескин тушиб кетди», — деди у.
Эслатиб ўтамиз, 2015 йилнинг 31 октябрь куни Россиянинг «Когалимавиа» компаниясига тегишли Airbus A321 самолёти Синайда қулади. Бортда бўлган 217 йўловчи ва экипажнинг етти нафар аъзоси ҳалок бўлди. Миср президенти февраль ойида A321 лайнери ҳалокатига теракт сабабчи бўлганлигини биринчи марта тан олди.
Изоҳ (0)