Россия Тергов қўмитаси Ходорковскийни давлатдан 50 млрд долларни ўмаришга ҳаракатда айблади

«ЮКОС» нефть компаниясининг собиқ раҳбари Михаил Ходорковский халқаро судлар ёрдамида давлатдан 50 миллиард доллар ундиришга ҳаракат қилмоқда. Бу ҳақда Россия Тергов қўмитаси расмий вакили Владимир Маркин маълум қилди, дея хабар беради Meduza.

Унинг айтишича, терговда Ходорковский «ЮКОС» акцияларини деярли сувтекин олгани ва аслини олганда, ўғирлаганини ошкор қилувчи етарлича асослар бор. Шу боис «ЮКОС» ва «Халлей Энтерпрайзис Лимитед», «Юкос Юниверсал Лимитед» ҳамда «Ветеран Петролеум Лимитед» компаниялари собиқ акциядорлари уларнинг инвестор сифатидаги ҳуқуқлари бузилганини даъво қилиб, Гаагадаги арбитражга товон сўраб мурожаат этишга ҳақли эмас, чунки улар ҳеч қандай  инвестиция қилмаган.

«ЮКОС» акцияларини сотиб олиш МЕНАТЕП банки маблағлари ҳисобига амалга оширилган, бироқ унга пуллари қайтарилмаган, банкнинг ўзи эса банкрот қилинган. Маркиннинг фикрига кўра, бу Ходорковский нефть компанияси акцияларини бировларнинг пулига, бекорга харид қилгани, яъни ўғирланганидан далолат.

Шунингдек, Ходорковский компания ривожи учун 350 миллион доллар ажратишни ваъда қилган, бироқ бунинг уддасидан чиқмаган.