Rossiya Davlat dumasi 25-mart, juma kuni Rossiya Federatsiyasi va O‘zbekiston Respublikasi hukumatlari o‘rtasida o‘zaro moliyaviy da’volar va majburiyatlarni tartibga solish to‘g‘risidagi kelishuvni ratifikatsiya qilish haqidagi qonunni qabul qildi. Bu haqda “Gazeta.uz” xabar bermoqda.
Kelishuv 2014-yil 10-dekabrda, Rossiya prezidenti Vladimir Putinning rasmiy tashrifi davomida Toshkentda imzolangandi. U tomonlar o‘rtasida sobiq Ittifoq operatsiyalari bo‘yicha yuzaga kelgan da’volar, jumladan, SSSR Olmos fondini bo‘lishish, Vneshekonombank hisob raqamlaridagi valyuta mablag‘lari, shuningdek, O‘zbekistonga 1992—1993-yillarda taqdim etilgan kreditlarni qaytarishdan voz kechishni anglatadi.
Qonunga ilova qilingan izohda ma’lum qilinishicha, Rossiya 2014-yil 1-noyabr holatiga O‘zbekistonning muddati o‘tgan 889,3 million AQSh dollari (jumladan, foizlar bo‘yicha 388,7 million dollar) miqdoridagi qarzidan kechadi.
“Imzolangan kelishuv Rossiya va O‘zbekiston o‘rtasidagi harbiy, iqtisodiy va siyosiy hamkorlikni kuchaytirish uchun qo‘shimcha imkoniyatlar paydo bo‘lishiga yordam beradi”, — deya ta’kidlagan Rossiya moliya vaziri o‘rinbosari Sergey Storchak.
Kelishuvning kuchga kirishi Rossiya budjet qonunchiligida mustahkamlab qo‘yilgan O‘zbekiston bilan kredit-moliyaviy hamkorlikka o‘rnatilgan taqiqni bekor qiladi.
Izoh (0)