Rossiya prezidenti Vladimir Putin Rostov-Donda yuz bergan aviahalokat sabab o‘z yaqinlarini yo‘qotgan barchaga hamdardligini bildirdi, Rostov viloyati gubernatori va Rossiya Favqulodda vaziyatlar vazirligi rahbariga halok bo‘lganlarning oila a’zolari uchun barcha zarur ishlarni amalga oshirish haqida ko‘rsatma berdi. Bu haqda Putinning matbuot kotibi Dmitriy Peskov ma’lum qildi, deya xabar bermoqda “TASS”.
“Gubernator Vasiliy Golubyev va favqulodda vaziyatlar vaziri Vladimir Puchkov Rossiya prezidenti Vladimir Putinga samolyot qulagan hududda olib borilayotgan qidiruv ishlari haqida axborot berdi. Putin hozirgi vaqtda eng asosiy masala — halok bo‘lganlarning oila a’zolari va yaqinlari bilan ishlash ekanligini ta’kidladi”, — dedi Putinning matbuot kotibi.
“Rossiya prezidenti aviahalokat sabab yaqinlarini yo‘qotgan barchaga o‘zining chuqur hamdardligini bildiradi”, — dedi Peskov.
Uning qo‘shimcha qilishicha, Boeing halokatga uchragan hududga Rossiya transport vaziri Maksim Sokolov, Rossiya favqulodda vaziyatlar vaziri Vladimir Puchkov, “Rosaviatsiya” rahbari Aleksandr Neradko va Rossiya prezidentining Rossiya Janubiy federal okrugi bo‘yicha vakili Vladimir Ustinov yo‘l olgan.
Eslatib o‘tamiz, 19-mart, shanba kuni FlyDubai aviakompaniyasiga tegishli Boeing 737-800 layneri Rostov-Don aeroportiga qo‘nishga urinish vaqtida halokatga uchradi. Hodisa oqibatida samolyot bortidagi 62 kishi — 55 yo‘lovchi va ekipajning yetti a’zosi halok bo‘ldi. Halok bo‘lganlardan biri O‘zbekiston fuqarosi ekanligi aytilmoqda.
Izoh (0)