Braziliya prezidenti Dilma Russeff o‘zining mamlakat sobiq yetakchisi Luis Inasiu Lula da Silva bilan telefon suhbatining tinglanishini noqonuniy deb atadi. Bunday bayonot bilan davlat rahbari Baiya shtatiga safari chog‘ida chiqish qildi, deb yozadi “TASS”.
“Ko‘plab mamlakatlarda prezident suhbatlarini Oliy sud ruxsatisiz tinglaydiganlar qamoqqa jo‘natiladi. AQSh prezidentini yashirincha tinglab ko‘ring-chi, shunda nima bo‘lishini ko‘rasiz”, — dedi Russeff.
16-mart, chorshanba kuni OAVlar Federal politsiya tomonidan yozib olingan audioyozuvni e’lon qildi, unda Russeff va Lula da Silvaning o‘zaro suhbatini eshitish mumkin. Suhbat chog‘ida davlat rahbari mamlakat sobiq yetakchisiga unga o‘z fuqarolik kanselyariyasi rahbarligiga tayinlangani haqidagi hujjatlarni yuborishini, ularni “zarur bo‘lganda” ishlatishi mumkinligini aytgan.
Amaldagi hukumat dushmanlari audioyozuvni Russeffning o‘z siyosiy ustozini va partiyadoshini qamoqdan hukumatdagi lavozim orqali qutqarishga urinishi deya talqin qildi: bir necha kun avvalroq prokuratura sobiq prezidentga qarshi pul yuvish aybini ilgari surgan va sudga uni hibsga olish haqida so‘rov yuborgan edi.
Russeff ushbu versiyani butunlay rad etdi: uning so‘zlariga ko‘ra, hujjat Lula da Silvaga imzolash uchun yuborilgan, chunki u lavozimga kirishish marosimida qatnashish-qatnashmasligiga ishonchi komil bo‘lmagan.
Izoh (0)