Rostov-Donda halokatga uchragan Boeing xorijiy kompaniya tomonidan sug‘urta qilingani bildirildi
Rossiyalik sayyohlarni Dubaydan Rostov-Donga parvozini amalga oshirgan aviatashuvchi javobgarligi Rossiya kompaniyalari tomonidan sug‘urta qilinmagan. Shundan kelib chiqib, sug‘urtalash xorijiy kompaniyalar tomonidan bajarilganini taxmin qilish mumkin. Bu haqda “SOGAZ” kompaniyasi boshqaruvi raisining birinchi o‘rinbosari Nikolay Galushin ma’lum qildi, deya xabar beradi “Interfaks”.
“Boeing kabi rusumdagi samolyotlarda yo‘lovchi tashish javobgarligining umumiy limiti barcha jarblanuvchilarga 600 million dollarni tashkil etadi. Rossiya qonunchiligiga ko‘ra esa, aviatashuvchining yo‘lovchilar oldidagi javobgarligi alohida sug‘urta qilinadi. Har bir halok bo‘lgan shaxs uchun to‘lovning eng yuqori miqdori 2 million rublni tashkil etadi, dafn marosimi uchun 25 ming rubl ajratiladi”, — deya ta’kidlagan Galushin.
Eslatib o‘tamiz, 19-mart, shanba kuni FlyDubai aviakompaniyasiga tegishli Boeing 737-800 layneri Rossiyaning Rostov-Don shahri aeroportiga qo‘nish vaqtida halokatga uchradi. Hodisa oqibatida samolyot bortida bo‘lgan barcha yo‘lovchilar va ekipaj a’zolari halok bo‘lgan.
