Россия президенти Владимир Путин Ростов-Донда юз берган авиаҳалокат сабаб ўз яқинларини йўқотган барчага ҳамдардлигини билдирди, Ростов вилояти губернатори ва Россия Фавқулодда вазиятлар вазирлиги раҳбарига ҳалок бўлганларнинг оила аъзолари учун барча зарур ишларни амалга ошириш ҳақида кўрсатма берди. Бу ҳақда Путиннинг матбуот котиби Дмитрий Песков маълум қилди, дея хабар бермоқда «ТАСС».
«Губернатор Василий Голубев ва фавқулодда вазиятлар вазири Владимир Пучков Россия президенти Владимир Путинга самолёт қулаган ҳудудда олиб борилаётган қидирув ишлари ҳақида ахборот берди. Путин ҳозирги вақтда энг асосий масала — ҳалок бўлганларнинг оила аъзолари ва яқинлари билан ишлаш эканлигини таъкидлади», — деди Путиннинг матбуот котиби.
«Россия президенти авиаҳалокат сабаб яқинларини йўқотган барчага ўзининг чуқур ҳамдардлигини билдиради», — деди Песков.
Унинг қўшимча қилишича, Boeing ҳалокатга учраган ҳудудга Россия транспорт вазири Максим Соколов, Россия фавқулодда вазиятлар вазири Владимир Пучков, «Росавиация» раҳбари Александр Нерадко ва Россия президентининг Россия Жанубий федерал округи бўйича вакили Владимир Устинов йўл олган.
Эслатиб ўтамиз, 19 март, шанба куни FlyDubai авиакомпаниясига тегишли Boeing 737-800 лайнери Ростов-Дон аэропортига қўнишга уриниш вақтида ҳалокатга учради. Ҳодиса оқибатида самолёт бортидаги 62 киши — 55 йўловчи ва экипажнинг етти аъзоси ҳалок бўлди. Ҳалок бўлганлардан бири Ўзбекистон фуқароси эканлиги айтилмоқда.
Изоҳ (0)